Badira urteak Hesiaren Aurkako Herri Komitea osatu eta ekintza zuzen ez-bortitzei ekin zietela. Astero-astero, manifestariak errepidera abiatzen dira. Hesitik ehun metrotara hurbiltzearekin batera, soldaduak tiroka hasten dira. Herriko gaztetxoek, aldiz, harri koxkorrak baino ez daukate okupatzaileek jaurtitako gomazko balei eta ke-poteei aurre egiteko. Eta ostiralero bezala herriko etxeetan harrera beroa egingo diete liskarretan zauritutakoei.
Edo Urbina izan liteke, Araban. Hor ere agintariek inposatutako azpiegitura erraldoi batek kolokan jarri du inguruko nekazarien geroa. Lehenago industria gunea eta autobidea izan ziren, orain, berriz, Abiadura Handiko Trena. Garai batean labore edo patata sailak zirenak indusmakinek hartu dituzte. Herritarrek, aho batez, proiektua errefuxatu bazuten ere, lurren jabetza kendu diete. Milaka lagun bildu dira azpiegituraren aurka deitutako protesta baketsura eta poliziak bortizki erantzun die manifestariei, gomazko bolaz eta makilkadaz.
Iaz Israelgo Auzitegi Gorenak Bil'in-darren aldarrikapenei amore eman eta errepidearen ibilbidea aldarazi zuen. Hondar ale txikiegia Palestinako borrokarako baina garaipen handi bat bertakoentzat. Hemen ere hondar aleen beharrean gaude.
Koldo Sagasti Buruaga
